بے بسوں پہ یتیموں پہ ہنستی رہی

بے بسوں پہ یتیموں پہ ہنستی رہی
فقرے بے کس پہ دنیا یہ کستی رہی


کچھ بھی دنیا میں اس کا تو اپنا نہیں
پھر بھی کیوں جان دنیا میں پھنستی رہی


چاہی جو نعمتیں تم وہ کھاتے رہے
بوڑھی ماں دیکھ کر ہی ترستی رہی


میں بلندی کی پرواز کرتا رہا
جو رہی میری منزل سو پستی رہی


شکر ہر حال میں کیوں نہ کرتا بھلا
آزمائش مری تنگ دستی رہی


عمر بھر زندگی کو میں روتا رہا
عمر بھر زندگی مجھ پہ ہنستی رہی


ایک سو برہمی ایک جانب خوشی
دل کے جو پاس تھی دل میں بستی رہی


بعد رخصت کے تنویرؔ یہ چشم نم
کیوں اسے دیکھنے کو ترستی رہی