صبح سفر کا راز کسی پر یہاں نہ کھول
صبح سفر کا راز کسی پر یہاں نہ کھول
طوفاں ہے پانیوں میں ابھی بادباں نہ کھول
پسماندگاں پہ چھوڑ کہ ڈھونڈیں نقوش پا
جو سنگ و خشت ہیں تہہ آب رواں نہ کھول
میں نے سراب فہم کے سب راز پا لئے
اب لاکھ مجھ پہ عقدۂ ہفت آسماں نہ کھول
سب کچھ یہاں ہے چشم خریدار کی پسند
عذر متاع درد اگر ہے دکاں نہ کھول
شاخ شجر پہ شعلۂ خورشید بجھ تو لے
کچھ دیر تیرگی پہ در خاکداں نہ کھول
ہر بزم کیوں نمائش زخم ہنر بنے
ہر بھید اپنے دوستوں کے درمیاں نہ کھول
شاہدؔ حصار جیل پہ تیشے سے وار کر
ان پتھروں کے روبرو اپنی زباں نہ کھول
