نظر کے سرخ ڈورے دل میں اترے

نظر کے سرخ ڈورے دل میں اترے
مسافر دامن ساحل میں اترے


فضاؤں میں اڑانیں بھرنے والے
پتنگے گوشۂ محفل میں اترے


کھنکتے نقرئی سکوں کے طائر
طلائی کاسۂ سائل میں اترے


کئی خنجر نگاہ خشمگیں کے
بہ یک لمحہ دل بسمل میں اترے


کفن بر دوش تھے اہل محبت
بقا کی جاوداں منزل میں اترے


نہ بھولے عہد حاضر کے تقاضے
غزل جب فکر کی محمل میں اترے


صباؔ کے ساتھ رحمت کے فرشتے
اچانک کوچۂ قاتل میں اترے