لہو میں ڈوبے ستم رسیدہ فگار چہرے

لہو میں ڈوبے ستم رسیدہ فگار چہرے
کتاب جیسے کھلے ہوئے بے شمار چہرے


رہین دوراں گراں بہا صورتیں ہماری
ہمارے جسموں کی زینتیں مستعار چہرے


ہزار چہرہ کتاب آنکھوں کے روبرو ہے
مگر سر راہ بھی جو مل جائیں چار چار چہرے


کوئی متاع عزیز از جاں چھنی ہے سب سے
جدھر بھی دیکھوں ہیں روبرو سوگوار چہرے


اسی سے ہے آشکار سارا ہنر ہمارا
ہمارے چہرے نہیں ہوئے آشکار چہرے


بھلا کسے آسمان گردش تلاشتی ہے
کہاں ہیں وہ خوش نمائیاں پر بہار چہرے