گوشت کہاں گیا

ایک دن ملا نصرالدین بکری کا گوشت لے کر آئے اور بیوی کو جلدی سے پکانے کی ہدایت کر کے واپس چلے گئے۔ بیوی نے گوشت پکایا۔ اتنے میں ان کی دو سہیلیاں آگئیں۔ بیوی نے انہیں کھانا کھلایا اور خود بھی کھایا۔ سارا گوشت ختم ہوگیا۔ ملا جی واپس آئے تو ان کے سامنے دال لاکر رکھ دی۔ انہوں نے پوچھا۔ ’’میں جو گوشت لایا تھا وہ کیا ہوا؟‘‘
بیوی نے جواب دیا۔ ’’وہ تو بلی کھاگئی۔‘‘ ملا جی نے پوچھا۔ ’’گوشت کا وزن کتنا تھا؟‘‘ بیوی نے جواب دیا۔ ’’آدھا کلو۔‘‘ ملا جی فوراً باورچی خانے سے ترازو لے کر آئے اور بلی کو پکڑا۔ ملا جی کی بلی بہت دبلی تھی۔ انہوں نے اسے تولا تو وہ ٹھیک آدھا کلو نکلی۔ انہوں نے کہا’’عجیب بات ہے، اگر یہ بلی ہے تو گوشت کیا ہوا؟ اور اگر یہ گوشت ہے تو بلی کیا ہوئی؟‘‘