دل تباہ ہو خنداں نہیں تو کچھ بھی نہیں

دل تباہ ہو خنداں نہیں تو کچھ بھی نہیں
خزاں میں رنگ بہاراں نہیں تو کچھ بھی نہیں


وہ دل جو نام محبت پہ مسکراتا ہے
حریف گردش دوراں نہیں تو کچھ بھی نہیں


یہ کرب و آہ کی دنیا عجیب دنیا ہے
اگر حیات غزل خواں نہیں تو کچھ بھی نہیں


جہاں کی خاک جو چھانے کوئی تو کیا حاصل
طواف کوچۂ جاناں نہیں تو کچھ بھی نہیں


زمانہ لاکھ ترقی کیا کرے لیکن
دلوں میں عظمت انساں نہیں تو کچھ بھی نہیں