تو ہے کہ چیستاں کی عبارت ہے تہ بہ تہ

تو ہے کہ چیستاں کی عبارت ہے تہ بہ تہ
دل ہے کہ سنگ بستۂ حیرت ہے تہ بہ تہ


جو آنکھ دیکھنے میں خرابہ دکھائی دے
سمجھو کہ اس میں کوئی امانت ہے تہ بہ تہ


بحر انا ہوں میری تہوں میں اتر کے دیکھ
خوابیدہ مجھ میں وقت کی میت ہے تہ بہ تہ


وہ چشم سرمہ سا کہ جسے بے زباں کہیں
اس کی خموشیوں میں اشارت ہے تہ بہ تہ


فرصت کہاں کہ غیر سے ہم دشمنی کریں
اپنا وجود ایک مصیبت ہے تہ بہ تہ


شاید کوئی گیا ہو زمانے سے کامگار
اپنی تو زیست کان ندامت ہے تہ بہ تہ