تو بھی تو ایک لفظ ہے اک دن مرے بیاں میں آ

تو بھی تو ایک لفظ ہے اک دن مرے بیاں میں آ
میرے یقیں میں گشت کر میری حد گماں میں آ


نیندوں میں دوڑتا ہوا تیری طرف نکل گیا
تو بھی تو ایک دن کبھی میرے حصار جاں میں آ


اک شب ہمارے ساتھ بھی خنجر کی نوک پر کبھی
لرزیدہ چشم نم میں چل جلتے ہوئے مکاں میں آ


نرغے میں دوستوں کے تو کب تک رہے گا سرخ رو
نیزہ بہ نیزہ دو بہ دو صف ہائے دشمناں میں آ


اک روز فکر آب و ناں تجھ کو بھی ہو جان جہاں
قوس ابد کو توڑ کر اس عرصہ زیاں میں آ