تم مجھے ڈھونڈتے رہے
اور میں تمہیں
اس چھپن چھپائی میں
ہم یہ ہی بھول گئے
ہم کسے ڈھونڈھ رہے تھے
ایک بار ہم راستے میں ملے تھے
لیکن تم نے مجھے نہیں پہچانا
میں بھی بھول گئی کہ میں تم کو ہی تو تلاش کر رہی تھی
ہم تلاش کے ایک ہی دائرے میں گھومتے رہے
ساری زندگی گزر گئی
تم کو یاد ہو
شاید نہیں
ہم ایک کیفے میں بھی ملے تھے
اور ایک سڑک پر اور ایک کمرے میں
اور ایک گھر میں
اور وہاں جہاں میں تھک گئی تھی
تم کو ڈھونڈتے ڈھونڈھے
اتنی اتنی کہ میری سانس پھولنے لگی
ہاں وہیں میں نے ارادہ ترک کر دیا
تمہیں ڈھونڈنے کا
