رنج دنیا ہو کہ رنج عاشقی کیا دیکھنا
رنج دنیا ہو کہ رنج عاشقی کیا دیکھنا
ساری خوشیاں حیرتیں سب ایک سی کیا دیکھنا
باغ بازار تماشا آنکھ جویائے بہار
چشم نرگس یا تن سرو سہی کیا دیکھنا
دیکھنا کیا ایک ہی شے سوئے باطن دیکھیے
بے حسی بے چہرگی بے منظری کیا دیکھنا
ساز میں بالائے نغمہ اور آوازیں بھی ہیں
اک شرار نغمگی آواز کی کیا دیکھنا
راہ صحرا ہے نہ آتی ہے کہیں فصل بہار
عشق میں دیوانگی جامہ دری کیا دیکھنا
مشکلوں میں کام آ جاتی ہے آشفتہ سری
اے جنوں سامان کار آگہی کیا دیکھنا
جب اسے دیکھا تو جی چاہا کہ دیکھا ہی کروں
سوچتا یہ تھا کہ ناز دلبری کیا دیکھنا
