قومی زبان

جا رہا تھا میں سر جھکائے ہوئے گزری اک ماہ رو برابر سے بھر کے اپنی نظر میں کچھ کرنیں اس نے سینے میں ڈال دیں میرے

رات کو بیٹھ کر لب دریا دیکھنا آسماں کے تاروں کا لوح دل پر ابھار دیتا ہے نقش گزری ہوئی بہاروں کا

ادھر دماغ ہیں ساکت دلوں کو سکتہ ہے ادھر سکوت بھی فریاد سے چھلکتا ہے وہاں تو حلق میں پھنستا نہیں نوالہ بھی یہاں یہ حال کہ سینے میں سانس اٹکتا ہے

وہ دل نہیں رہا وہ طبیعت نہیں رہی وہ شب کو خون رونے کی عادت نہیں رہی محسوس کر رہا ہوں میں جینے کی تلخیاں شاید مجھے کسی سے محبت نہیں رہی

گوشۂ باغ کی ملاقاتیں اور راز و نیاز کی باتیں اے دل! ارمان رہ نہ جائے کوئی پھر نہ ہوں گی نصیب یہ راتیں

آب دریا میں ہے جس طرح روانی پنہاں جیسے الفاظ میں ہوتے ہیں معانی پنہاں نغمہ گر! یونہی ترے درد بھرے نغموں میں ہے مرے درد محبت کی کہانی پنہاں

عمر بھر جینے کی تہمت بھی اٹھے گی یارب اور پھر حشر کی زحمت بھی اٹھے گی یارب لیکن اپنا یہ جنوں ہائے یہ جنس نایاب کبھی اس جنس کی قیمت بھی اٹھے گی یارب

ایک صبر آزما جدائی ہے ملنے جلنے کی بند ہیں راہیں میں نے اس ماہ رو کی گردن میں ڈال دی ہیں خیال کی باہیں

تمام عمر میں آنسو بہاؤں گا اخترؔ تمام عمر یہ صدمہ رہے گا میرے ساتھ کہ اپنے آپ کو میں نے فروخت کر ڈالا کسی کو پانے کی ناکام آرزو کے ہات

یہ بوسیدہ پھٹی گدڑی یہ سوراخوں بھری کملی جسے سب آسماں کے نام سے موسوم کرتے ہیں تری رحمت کے قرباں! اس کو نیچے پھینک دے یارب زمیں والے بہت راتوں کی سردی میں ٹھٹھرتے ہیں