ننھی

صبح سویرے جاگی تھی
اماں اماں اٹھ نا اماں
یہ دو وہ دو یہ ناں وہ ناں
جیب بھری اور بھاگی ننھی
ناشتہ ننھی آ گئی ننھی
پانی پی کر اٹھی ہے یوں
روٹی رکھی ہے جوں کی توں
سارا انڈا کھا گئی ننھی
ننھی گڑیا کھیل رہی ہے
گڑیا کو اب نیند آئے گی
اٹھے گی تو کیا کھائے گی
ننھی روٹی بیل رہی ہے
ننھا اس کا چھوٹا بھائی
پورا بمپٹ بھاری نٹ کھٹ
ہر دم ننھی سے ہے کھٹ پٹ
چھین جھپٹ کہرام لڑائی
ابا اچھے ہیں یا اماں
بولو تو ننھی کون اچھا
ڈپلومیٹک ہے جواب اس کا
ابا اماں ابا اماں
جانے کیا کیا بول رہی ہے
دادی اماں سے ہے گلوات
ننھی کی میٹھی میٹھی بات
کانوں میں رس گھول رہی ہے
گھر بھر کی زباں پر اس کا نام
یہ لا ننھی وہ لا ننھی
پنکھا ننھی پیڑھا ننھی
تل تل کرتی ہے وہ سب کام