ملبوس غبار یاد رکھنا

ملبوس غبار یاد رکھنا
یہ راہ گزار یاد رکھنا


اک شام خزاں یہیں کہیں ہے
اے صبح بہار یاد رکھنا


ہم کشتی عشق کے مسافر
اترے نہیں پار یاد رکھنا


اے زخمہ وران بربط دل
ٹوٹے ہوئے تار یاد رکھنا


پت جھڑ کی ہوائیں چیختی ہیں
کیا صوت ہزار یاد رکھنا


ہم جاتے ہیں بار غم اٹھائے
اے شہر نگار یاد رکھنا


عبرت کا مقام ہے یہ دنیا
ویران دیار یاد رکھنا


اے وادئ گل کو جانے والے
رستوں کے یہ خار یاد رکھنا


ملتی ہے غموں سے بھی بصیرت
زخموں کا شمار یاد رکھنا


بچپن کے مکاں کا نخل ہم راز
یہ ہار سنگھار یاد رکھنا


یہ حرف ہے روشنیٔ فردا
حرف سر دار یاد رکھنا


شاید میں یہ خواب بھول جاؤں
تم اے مرے یار یاد رکھنا