کسی بے کس کے کاسے میں جو تو مقدور ہو جائے

کسی بے کس کے کاسے میں جو تو مقدور ہو جائے
گدا ہو کر وہ رشک قیصر و مغفور ہو جائے


محبت چاہئے دل میں محبت ہے تو سب کچھ ہے
یہ ہے تو دل کی تاریکی سراپا نور ہو جائے


محبت کھیل ہے الٹا اسے چاہو یہ کھنچتی ہے
کوئی آئے قریب اس کے تو یہ خود دور ہو جائے


زمانے کے حوادث سے دل عاشق تو پتھر ہے
محبت میں جو یہ ٹوٹے تو چکنا چور ہو جائے


جو میں مسرور ہوتا ہوں تجھے مغموم پاتا ہوں
جو میں مغموم ہو جاؤں تو تو مسرور ہو جائے