جہاں اشک حسرت رواں چھوڑ آئے

جہاں اشک حسرت رواں چھوڑ آئے
محبت وہاں نیم جاں چھوڑ آئے


ہمارے ہی خوں کی گلوں میں ہے سرخی
چمن در چمن داستاں چھوڑ آئے


قفس کی دلآویزیاں ہم سے پوچھو
قفس کے لیے آشیاں چھوڑ آئے


بھرم کھل نہ جائے ترے آستاں کا
ترا آستاں مہرباں چھوڑ آئے


مسافر نہ بھٹکے گا رستے سے کوئی
کہ ہر گام پر اک نشاں چھوڑ آئے


دھواں اٹھ رہا ہے جو صحن چمن سے
دھواں ہے کہاں ہم فغاں چھوڑ آئے


بھری انجمن میں ہم آئے غزل خواں
بھری انجمن نوحہ خواں چھوڑ آئے


انہیں وادیوں کی رلاتی ہیں یادیں
جنہیں بختؔ ہم گل فشاں چھوڑ آئے