ایک سوال

ابو میرے پاس تو آنا
اتنی بات مجھے سمجھانا
ہم جب آپس میں لڑتے ہیں
آپ ہمیشہ یہ کہتے ہیں
لڑنا بھڑنا ٹھیک نہیں ہے
جھگڑا کرنا ٹھیک نہیں ہے
اچھے بن کر جینا سیکھو
مل جل کر تم رہنا سیکھو
میں نے اخباروں میں پڑھا ہے
ٹی وی پر بھی اتنا سنا ہے
دنیا میں پھر اک جنگ ہوگی
کھلیں گے سب خون کی ہولی
میزائل اور بم برسیں گے
امن و اماں کو ہم ترسیں گے
لاشوں کا بازار لگے گا
سہما سا سنسار لگے گا
میں بچہ ہوں میں کیا سمجھوں
میں تو بس اتنا ہی پوچھوں
بچے آخر پھر بچے ہیں
جو دانا ہیں کیوں لڑتے ہیں