بیاں میں تیرے ہر طرز بیاں گم

بیاں میں تیرے ہر طرز بیاں گم
فسانے میں مرے ہر داستاں گم


نہ ہم گم ہیں نہ تیرا آستاں گم
مگر کچھ سلسلہ ہے درمیاں گم


عجب انداز ازخود رفتگی ہے
بھری محفل میں سب کے درمیاں گم


رہی صحرا بہ صحرا تیری منزل
ہوئے منزل بمنزل کارواں گم


روانہ کارواں سالار ناپید
سفینہ باد پیما بادباں گم


قریب و دور وہم نارسائی
کبھی منزل کبھی خود کارواں گم


ہوئے انجمؔ سحر کی جستجو میں
مثال لکۂ‌ ابر رواں گم