نظم

سماں بدلا
ہوا بدلی
سیاہی رات کی بدلی
فضا میں تیرتی اور چیختی بوئے لہو بدلی
جو گردش میں ہیں تارے
کیا ذرا بھی ان کی رو بدلی
نہیں بدلی
تمازت دن کی بدلی
یا اداسی شام کی بدلی
جھلستی دھوپ بدلی نہ سلگتی دوپہر بدلی
صبا کی تازگی بدلی
نہ خوشبو سحر کی بدلی
دعا بدلی
اذاں بدلی
غریبوں کی فغاں بدلی
امیروں کی انا بدلی
نہیں بدلی
نہ اوپر آسماں بدلا
نہ نیچے یہ زمیں بدلی
نہ ظالم کی ہنسی بدلی
نہ مظلوموں کی بیکس بے اماں بے آسرا سی التجا بدلی
اگر بدلا تو اک ہندسہ
نہیں بدلی تو تقدیریں
نہیں بدلے تو اپنے خواب
اور ان خوابوں کی تعبیریں
اور ان سے منسلک اپنے دکھوں کی داستاں
اپنے غموں کی داستاں
بالکل نہیں بدلی
تو کیا بدلا