مہر و الفت سے مآل تہذیب

مہر و الفت سے مآل تہذیب
خاکساری ہے کمال تہذیب


ہے وہ آرائش حسن باطن
جس کو کہتے ہیں جمال تہذیب


کم نہیں مردمک چشم سے کچھ
رخ انسان پہ خال تہذیب


آج کل ہم میں اگر سچ پوچھو
شکل عنقا ہے مثال تہذیب


کبھی ہوتا نہیں بد وضع کا خوف
ہے عجب جاہ و جلال تہذیب


رخ پہ کرتا ہے متانت پیدا
دل میں آتے ہی خیال تہذیب


اپنے مطلب کا جہاں کچھ ہو لگاؤ
نہیں رہتا ہے خیال تہذیب


قوم کا اپنے نہ گھٹتا وہ عروج
ہو نہ جاتا جو زوال تہذیب


جام جم سے ہے کہیں پر تمکیں
بزم خلت میں سفال تہذیب


اس کا خوں کرتے ہیں جو ناحق کوش
ان کی گردن پہ وبال تہذیب


مردہ قوموں کے لئے آب حیات
بنتا جاتا ہے زلال تہذیب


بدر بن جائے گا چندے میں حبیبؔ
حق نے چاہا تو ہلال تہذیب