خالی ہے طلب گاروں سے بازار تمنا
خالی ہے طلب گاروں سے بازار تمنا
آتا ہی نہیں کوئی خریدار تمنا
ہر چند کہ رہتا ہے وہ بیزار تمنا
دامن میں سمیٹے ہے مگر خار تمنا
سب اپنی خموشی کا لہو چاٹ رہے ہیں
کرتا ہی نہیں اب کوئی اظہار تمنا
اس قصر ہوس سے کوئی باہر نہیں آتا
کہنے کو تو ہر شخص ہے بیزار تمنا
پیوند زمیں کر نہ سکا سیل بلا بھی
ہے سر بہ فلک آج بھی دیوار تمنا
کوئی بھی نہیں کم ہے کسی سے یہاں اخترؔ
ہر شخص ہے اس شہر میں شہکار تمنا
