ہوا نقیب بہاراں ابھی نہیں اے دل

ہوا نقیب بہاراں ابھی نہیں اے دل
یہ رت بدلنے کا امکاں ابھی نہیں اے دل


فراق نغمہ سے میرے ہی لب ملول نہیں
کوئی پرندہ غزل خواں ابھی نہیں اے دل


ابھی کچھ اور خجل ہو رہ تمنا پر
تو اس کے لطف کا عنواں ابھی نہیں اے دل


اسے بھلانے میں کچھ وقت تو لگے گا مجھے
یہ کام اتنا بھی آساں ابھی نہیں اے دل


تم اپنی ساری کمندیں نہ پھینک دینا کہیں
ادھر وہ چشم گریزاں ابھی نہیں اے دل


سنور کچھ اور کہ جلوه نمائياں تیری
نگاہ شوق کے شایاں ابھی نہیں اے دل


چراغ خواب ہو روشن تو کوئی بات بنے
نشاط دیدۂ حیراں ابھی نہیں اے دل