ایک ہی بار میں خوابوں سے کنارہ کر کے

ایک ہی بار میں خوابوں سے کنارہ کر کے
بجھ گئی دید شب وصل نظارہ کر کے


جز ترے اور طریقے بھی نکل سکتے تھے
ہم نے دیکھا ہی نہیں خود کو دوبارہ کر کے


ہم تو بس بولنے والے تھے سبھی کچھ سچ سچ
تم نے اچھا ہی کیا چپ کا اشارہ کر کے


ہم تو صدیوں سے اسی طور بسر کرتے ہیں
تم بھی کچھ روز یہاں دیکھو گزارا کر کے


خود کو سونپا تھا تمہیں ہم کو تمہارا کرنے
تم نے لوٹایا ہمیں ہم کو ہمارا کر کے


کرتے رہتے ہیں جو ہر وقت تمہارا چرچا
خود کو چھوڑیں گے کسی روز تمہارا کر کے


اب یہ دریا یہ تلاطم یہ سفینہ کیا ہے
ہم تو سب بھول گئے تم کو سہارا کر کے