دم جنوں کی حد انتہا پہ ٹھہرا ہے

دم جنوں کی حد انتہا پہ ٹھہرا ہے
یہ میرا دل ہے ابھی ابتدا پہ ٹھہرا ہے


اسی کے لمس سے آب و ہوا بدلتی ہے
تمام منظر جاں اک ادا پہ ٹھہرا ہے


کنار کن سے پرے ہے کہیں وجود اپنا
یہ کارواں تو غبار صدا پہ ٹھہرا ہے


کچھ اور دیر نمائش ہے شور و شر کی یہاں
یہ اک حباب ہے موج فنا پہ ٹھہرا ہے


شعاع صبح بن گوش میں اترتی ہے
زوال مہر کہ دست حنا پہ ٹھہرا ہے


شب سیاہ سر خال میں سمٹتی ہے
ستارہ ٹوٹ کے بند قبا پہ ٹھہرا ہے


نفس نفس میں بھڑکتی ہے دل کی لو سرمدؔ
عجب چراغ ہے یہ بام ہو پہ ٹھہرا ہے