بھائی بہن

دیکھو بھیا مان بھی جاؤ
میرا گھروندا یوں نہ گراؤ


محنت سے ہے میں نے بنایا
اپنی گڑیا کو ہے بٹھایا


ڈانٹ امی سے کھلوا دوں گی
ابا سے میں پٹوا دوں گی


میرا گھروندا ڈھایا تم نے
میرا کھیل مٹایا تم نے


روتی ہوں تو ہنستے ہو تم
بڑے ہی اچھے لگتے ہو تم


میں بھی گیند تمہاری لے کر
پھینکوں گی اب چھت کے اوپر


روؤ گے تو خوب ہنسوں گی
کوئی کھلونا تمہیں نہ دوں گی


اچھا دیکھو منہ نہ بسورو
ساری چیزیں آ کے سمیٹو


آؤ گھروندا پھر سے بنائیں
گڑیا گڈا اس میں بٹھائیں


آؤ کر دیں ختم لڑائی
میں ہوں بہن تم میرے بھائی